Zibersegurtasun Industrialeko Laborategia zer den

Zibersegurtasun Industrialeko Laborategia ZIURen oinarrizko azpiegitura da. Bertan, zibersegurtasun probak egiten ditugu zibererasoak jasateko arriskua duten industriaren arloko osagaietan, sistemetan, prozesuetan eta hainbat teknologiatan.

Laborategiak duen ekipamenduari esker, industria ingurune baten sarea simula daiteke eskala txikian, teknologia horiek Gipuzkoako industria prozesuetan duten sarrera maila berberarekin

Azpiegitura horri esker, modu praktiko eta esperimentalean jakin daiteke zer nolako ondorioak dituzten, bai zibersegurtasunak eta bai fabrikazio aurreratuko ereduetan aplikatzen den teknologiak ere. Hainbat proba teknologikoren eta zibersegurtasun proben bidez, dauden arriskuei buruzko hipotesi potentzialak frogatzen ditugu, fabrikazio prozesuak digitalizatzeko funtsezkoa den ezagutza lortuz. Jardunbide egokien eta gomendioen bidez, zibersegurtasunarekin lotutako mehatxuei aurre egiteko gai izango gara.

ZIURen laborategian egin daitezkeen prozesuak

Prozesu industrialen demostrazioak

Laborategia prestakuntzarako eta ikaskuntzarako lekua da. Gipuzkoako industria enpresetako, teknologia zentroetako, jakintza zentroetako eta lanbide heziketako zentroetako langileak gaitzeko eta esperimentatzeko balio du.

Automatizaziorako eta kontrolerako gailuak ditugu, bai eta segurtasun gailuak ere, emulatu edo erakutsi nahi den industria prozesuaren arabera konektatu daitezkeenak.

ZIURen laborategian hiru demostrazio mota egin daitezke:

  • Laborategi birtuala: Software simulazio batean oinarritutako Purdue ereduaren beheko mailak ditu, baita 2. mailakoak ere.
  • Laborategi fisikoa: Hardware ekipamenduaren bidez benetako prozesu industrialaren aldagaiak bildu eta kontrolatzen dituzten maketetan oinarritzen da. Zibereraso multzo bat simulatzen da, prozesuei eragiteko eta prozesuak zibersegurtasun industrialerako irtenbideekin indartu ahal izateko.

Sarearen Segurtasuneko Laborategia

Sare industrialen segurtasunari dagokionez, ZIURen laborategiak helburu hauek ditu:

  • Sare industrialetan garatutako edo ezarritako zibersegurtasuneko neurri eta funtzionalitate berriak probatzea.
  • Zibersegurtasun mehatxu berberarentzat hainbat fabrikatzailek ematen dituzten proposamenak ebaluatzea eta probatzea, eta alderatu ahal izatea.
  • Automatizaziorako eta kontrolerako sistemen arriskua arinduko duten zibersegurtasunerako tresna berriak probatzea, ingurune industrial batera nola egokitzen diren egiaztatzeko eta elkarren artean alderatzeko.
  • Sareko arkitekturek eta babes neurriek industria prozesuan zer nolako eragina duten egiaztatzea.

Laborategiak industria prozesu zehatz eta adierazgarri bat simulatuko du, Gipuzkoako enpresetan aurki ditzakegunak bezalakoa. ZIURen azpiegitura malgua da, sareko elementu ugari egokitzeko modukoa, eta sare independenteak, eremuak eta bideak erraz sortzeko pentsatuta dago.

Produktuaren Segurtasuneko Laborategia

Erdigunean jarri dira, bai produkzio lerrotik hurbilen dauden prozesu industrialetako eragiketa-osagaien behe-mailako analisia (sentsoreetatik hasi eta kudeaketa sareraino) eta bai industria sarera konektatuta egongo diren beste ekipo batzuena. Horretarako, hainbat teknologia baliatzen dira, hala nola PLC, RTU, HMI, SCADA o MES.

Laborategian honakoak egin daitezke:

  • Automatizaziorako eta kontrolerako sistemen osagaien berezko segurtasuna hobetzeko garatu diren zibersegurtasunerako funtzionalitateak edo neurriak probatzea eta ebaluatzea.
  • Zibersegurtasunarekin lotutako funtzionalitate berbererako hainbat fabrikatzailek egindako proposamenak probatzea, ebaluatzea eta alderatzea.

Laborategi honek Gipuzkoako industriaren arloko enpresek garatutako gailu berriak nahiz gure industrian txerta daitezkeen beste fabrikatzaile batzuen produktuak probatzeko balio du. ZIURekin elkarlana eginez, enpresek aukera dute beren produkzio sisteman fabrikatzen dituzten eta/edo hedatuko dituzten produktuen segurtasuna baloratzeko.

Zibersegurtasun Industrialeko Laborategia

Zibersegurtasuneko laborategia automatizazio eta kontrol industrialeko osagai edo sistema oso jakin batzuk egiaztatzeko probak egitera bideratuta dago.

Osagaiaren, sistemaren edo produktuaren zibersegurtasuna aztertzen da, hura erabiltzen duten enpresen instalazioetan hedatuta dagoen modua aintzat hartuz. Amaierako helburua da antzematea zer ahulezia dituen orain hedatuta dagoen moduan. Gainera, osagai eta sistema bakoitzerako konfigurazio egokienak baloratzen dira.

Sistema zehatzetan ahuleziak edo erasoak probatzeko eta erasoen ondorioen erreplikak egiten saiatzeko balio du, aurreko urratsak eta emaitzak aztertuz, konpromiso adierazleak, taktikak, teknikak eta eraso metodoak sortu ahal izateko (IoC eta TTP).

Nola funtzionatzen du?

ZIURen laborategia zentroko langileek kudeatzen dute. Instalazioa, egoera bakoitzean identifikatutako beharraren arabera, hainbat helburu betetzeko prestatuta dago. Azpiegitura teknikoari eta lotutako zerbitzuei esker, simulatu beharreko kasu zehatza birsor edo irudika daiteke.

Kudeaketa

Elkarlanean oinarritutako laborategia

Laborategi honen funtsezko elementuetako bat haren kudeaketa da. Elkarlanak gauzatzen saiatzen gara, bai eta parte hartzen duten eragileek elkarrekin definitutako proiektuetatik eratorritako jarduera partekatuak egiteko leku bihurtzen ere.

ZIURen zeregina elkarlan hori sortzea eta identifikatzea da, eta, besteak beste, elkarlana laborategi honen bidez bideratzea.

  • Tailerrak eta gaikuntza jarduerak identifikatzeko eta gauzatzeko tresna praktiko gisa.
  • Enpresek eskatutako berariazko proiektuetarako, dauden plataforma teknologikoak haien eskura jarriz, eragiteko langileekin edo langilerik gabe.
  • Elkarlanean ari diren hainbat erakunderen ikerketa proiektuetarako.

Ekipamendua

Punta-puntako teknologia

Instalazioetako teknologia punta-puntakoa da. Horrela, bere instalazioek sektoreko enpresek, teknologia zentroek eta unibertsitateek daukaten gaitasuna areagotzen eta osatzen dute.

Gune independentea da, eta esperimentazio jarduerei aplikatzen zaizkien arauzko eskakizun sektorialei heltzeko prestatuta dago. Zerbitzu estandarrak ditu, bai IT eta bai OT , aztertutako produktuen segurtasuna aztertzeko eta probak egiteko tresnez gainera.

Probak egiten ditugu

  • Zibersegurtasunerako teknologientzat
  • Industriaren arloko produktu propioentzat edo erositakoentzat
  • Osagaientzat
  • Sistementzat

Laborategian honakoak egiteko aukera izango duzu:

  • Erosi duzun produktu bati proba egitekoa
  • Proiektu pilotu bat egitekoa
  • I+G+b proiektuak garatzekoa