Gipuzkoako industria buru-belarri ari da lanean Europako zibersegurtasun araudia betetzeko ZIURen lehen azelerazio programan

Gipuzkoako industria buru-belarri ari da lanean Europako zibersegurtasun araudia betetzeko ZIURen lehen azelerazio programan

Lurraldeko 80 bat enpresa lider joan dira Foru Aldundiak eta ZIURek antolatutako aurkezpen ekitaldira

Gipuzkoako Foru Aldundiak, ZIUR –Zibersegurtasun Industrialeko Zentroa– fundazioaren bidez, konektatutako produktu industrialetan zibersegurtasunaren Europako araudia betetzeko lehen Azelerazio Programa aurkeztu du ofizialki lurraldeko industriaren aurrean. 3 milioi euroko ekimen aitzindaria da. Helburua Gipuzkoako enpresa sarearen lehiakortasuna, berrikuntza eta egokitzeko gaitasuna indartzea da, konexio digitala duen industria produktu orori eragingo dioten erregulazioen etorreraren aurrean.

Lurraldeko 80 bat enpresa lider inguru izan dira Mubileko instalazioetan egin den ZIURen programaren aurkezpenean. Aurkezpen-ekitaldian, Unai Andueza Ekonomia Sustapeneko eta Proiektu Estrategikoetako diputatuak adierazi duenez, “Gipuzkoako Foru Aldundiak enpresa sarearen lehiakortasuna ziurtatzeko eta merkatuan duen balio-apustua hobetzeko funtsezko ekimen gisa ulertzen du proiektua”. “Gaur ikusten dugun parte-hartze handiak agerian uzten du erakundeak, fabrikatzaileek eta garatzaileek industriaren lehiakortasuna eraldatuko duen esparru arautzailearen aurrean partekatzen duten erronka”, adierazi du.

Ekitaldiaren esparruan bi mahai-inguru egin dira, ekosistema industrialeko eta zibersegurtasuneko funtsezko eragileak biltzeko. Lehenengoaren izenburua ‘Programa bultzatzeko erreferentziazko eragileak dituen Partzuergoa’ izan da, eta María Penilla ZIUReko zuzendari nagusiak moderatu du. Javier Benitok (Telefónica Euskadiko zuzendaria), Salva Trujillok (ORBIKeko CEOa) eta Pablo Echevarríak (Thaleseko CEOa) hartu dute parte, eta lankidetzak arauen egokitzapena bizkortzeko duen garrantziaz eztabaidatu dute.

Bigarren mahaia, ‘Nola egin aurre produktu konektatu baten ziurtapenari (HW edo SW)’, Urko Zurutuza Mondragon Unibertsitateko Datuen Analisiko eta Zibersegurtasuneko Ikerketa Taldeko koordinatzaileak, moderatu du, eta Juan Rico (Eclipse Fundazioko Oniro eta Cloud programen kudeatzaile seniorra), Amor Domínguez (TÜV NORD taldeko TÜViT-erako Negozio Garapenaren arduraduna) eta David Rivera Castro (Siemens S.A.-ko komunikazio industrialetako teknikari komertziala) elkartu ditu, konektatutako produktu industrialen etorkizuna markatuko duten ziurtapen prozesuei buruzko gako eta esperientzia praktikoak partekatzeko.

Aholkularitzak, diagnostikoak eta ahultasunen analisia

Ekimena Telefónica, Thales, Orbik, Vicomtech, Ikerlan, Mondragon Korporazioa eta AFM bezalako erreferentziazko beste eragile batzuen lankidetzari esker antolatzen da. Horiek guztiek ebaluazio-, saiakuntza- eta ziurtapen-zerbitzu aurreratuak eskaintzeko gai den ekosistema osatzen dute. ZIUReko zuzendariak azaldu duenez, lurraldeko enpresa guztiek programari lotutako zerbitzuak eskuratzeko aukera izango dute, eta horiek Europako araudi berriak betetzen aurrera egiten joateko prestatuko dituzte, hala nola, bereziki automobilgintzaren, gailu medikoen edo ekipo erradioelektrikoen sektoreei eragingo dieten Cyber Resilience Act (CRA), UNECE R-155, ISO 21434, MDR edo RED.

Proiektuaren barruan sartzen dira ziurtapen jarduerak, prestakuntza tailerrak, aholkularitza sektoriala eta industriako osagaien ahultasunen auditoretzak eta analisiak egitea. Horretarako, parte hartzen duten eragileek zibersegurtasun industrialeko hiru laborategi eta OT, IoT eta IoMT-n espezialista diren 10 kidez osatutako taldea jarriko dituzte enpresen eskura proiektuak irauten duen 24 hilabeteetan. Aurreikuspenen arabera, 80 produktu arte ebaluatuko dira. Gipuzkoan egoitza soziala edo fiskala duten eta produktu konektatuak garatzen dituzten ETEek helbide honetan aurkez dezakete eskaera: https://www.ziur.eus/eu/behatokia/industria-produktua-ebaluatzeko-proiektua

Bultzada estrategikoa

Proiektuaren helburua Gipuzkoa osagai eta gailu industrialen zibersegurtasunaren ebaluazioan estatuko eta nazioarteko lidergo posizioan jartzea da. Epe labur eta ertainean eragin nabarmena izango duela aurreikusten da, gaitasun tekniko eta profesional berriak bultzatuz zibersegurtasun industrialeko zerbitzuen enpresa hornitzaileetan, eta lurraldeko konpainiek erregulazio eta merkatu eskakizunei aurrea hartzea erraztuz.

Ildo horretan, industriaren sektoreari lagundu nahi dio bere merkatuak eta arauzko eskakizunek zibersegurtasunaren arloan eskatuko dizkioten beharrak ezagutzen eta betetzen, produktuaren zibersegurtasun ebaluazioetan espezializatutako ekosistema kolaboratiboa eta irekia sortzen, lurraldeko enpresa sareari balioa ematen jarraitzen eta Gipuzkoan startupak eta talentua sortzen, erakartzen eta bizkortzen.