ZIURen txosten berri batek nabarmendu duenez, Espainia desagertu egin da hacktibismoak gehien erasotu dituen 10 herrialdeen zerrendatik
ZIURen txosten berri batek nabarmendu duenez, Espainia desagertu egin da hacktibismoak gehien erasotu dituen 10 herrialdeen zerrendatik
ZIURek Ziberadimen Industrialari buruzko txosten berri bat argitaratu du. Bertan nabarmentzen denez, Espainia desagertu egin da hacktibismoak gehien erasotu dituen 10 herrialdeen zerrendatik. 2025eko lehen hiruhilekoari zegokion dokumentuan Estatuko erakundeetan erregistratutako eraso kopurua “izugarri handitu” zela ohartarazten zuen bitartean, urteko bigarren hiruhilekoari buruzko txostenean adierazten du Espainia jada ez dagoela eragile erasotzaileen tipologia horrek gehien erasotzen dituen Europako herrialdeen artean.
Aldi horretan, hacktibismoak gora egin du Europan, aurreko aldiekin alderatuta; izan ere, hainbat herrialdetara zuzendutako zerbitzu arrakastatsuak ukatzeko 2.518 eraso zenbatu dira. Kaltetuenak Polonia, Ukraina eta Erresuma Batua izan dira, lehen, bigarren eta hirugarren postuetan, hurrenez hurren, eta ondoren Frantzia, Alemania, Herbehereak, Finlandia, Lituania, Errumania eta Israel daude. Espainiari dagokionez, eraso asko jaso ez arren, gehienak elikadura plantetan, ura tratatzeko plantetan eta zentral energetikoetan zentratu dira.
“Europa mailan, talde hacktibisten jarduera handiagoa hauteman da, baina Telegram bezalako hedapen-kanalak ixteko etengabeko ahaleginek zaildu egin dituzte erasoak. Hala ere, azpiegitura kritikoak erasotzeko joera handiagoa ikusi da”, adierazi du María Penilla Gipuzkoako Foru Aldundiko ZIUR Zibersegurtasun Industrialeko Zentroko zuzendari nagusiak. Europako erakundeei dagokienez, gehien kaltetutako sektoreen artean gobernukoa eta energiakoa nabarmentzen dira, eta hori bat dator talde hacktibisten motibazioarekin.
Hala, eraso aurreratuagoak antzeman dira, besteak beste, kontrol industrialeko sistemetan (ICS) izandako intrusioak, datuen filtrazioa eta baimenik gabeko sarbidea. ICSren aurkako erasoak izan dira hiruhileko honetako gertakari hacktibisten % 31, aurreko aldian baino % 29 gehiago. Ildo horretan, batez ere Europako energia sektorearen aurkako kanpaina koordinatua egin duten Errusiari lotutako taldeak nabarmendu dira.
Ransomware eraso kopurua bikoiztu egin da
Espainia hacktibista taldeen erasoek gehien kaltetutako herrialdeen zerrendatik desagertu den arren, ransomwareari dagokionez erregistratutako gertakariak bikoiztu egin dira, 38 kasu baieztatu baitira. Sektore kaltetuenak manufaktura, osasuna, hezkuntza eta eraikuntza izaten jarraitu dute, eta sektore teknologikoaren aurkako erasoek ezohiko gorakada izan dute, ZIURek egindako dokumentuaren arabera.
Azkenik, gorakada txiki bat antzeman da ahultasunen argitalpenari dagokionez, eta guztira 12.289 argitaratu dira.
Txosten osoa hemen irakur dezakezu.