ZIURek aeronautika- eta espazio sektoreak europako araudira egokitzen laguntzera zuzendutako tresnak eta programak partekatu ditu
ZIURek aeronautika- eta espazio sektoreak europako araudira egokitzen laguntzera zuzendutako tresnak eta programak partekatu ditu
SPRI taldeak antolatutako saioan hogei profesional eta enpresei ZIUR Azelerazio Programa aurkeztu die
SPRI taldeak, ZIUR Fundazioaren, Cybasqueren, Seinale eta Oesia enpresen laguntzarekin, eta Hegan klusterraren lankidetzarekin, ‘Aeronautika- eta espazio-sektorean NIS2 eta CRA araudien adopziorako bide-orria’ jardunaldia antolatu du Bizkaiko Parke Teknologikoan, Zamudion. Topaketak, zibersegurtasuna indartuko eta lagunduko duten neurriak proposatzeko helburuarekin, sektoreko profesionalak eta enpresak bildu ditu. Ekimenak, era beran, Europako zein tokiko politika eta ekimenekin lerrokatzea bilatu du.
Topaketa Euskadiko Zibersegurtasun Mahaien proiektuaren baitan kokatzen da. Ekimen horren helburua, erakundeen, klusterren eta zibersegurtasunaren arloko erreferentziazko enpresen arteko lankidetzaren bidez, euskal enpresa-sarearen erresilientzia digitala indartzea da.
Jardunaldian zehar, Seinale eta Oesia enpresek NIS2 zuzentarauaren eta Cyber Resilience Act (CRA) legearen betetzearekin lotutako erronka nagusiak aztertu dituzte. Europako bi arau horiek funtsezkoak dira konektatutako produktu eta zerbitzuen zibersegurtasuna indartzeko. Aeronautika- eta espazio-sektoreei aplikatu beharreko obligazioak azaltzeaz gain, bi konpainiek arrakasta-kasuak eta proiektu baten adibide praktiko bat aurkeztu dituzte.
Bestalde, María Penilla ZIUReko zuzendari nagusiak NIS2 zuzentarauari eta CRA legeari lotutako framework-ak aurkeztu ditu, baita aeronautika- eta espazio-sektoreetako zibersegurtasunaren egungo egoeraren erradiografia bat ere. Bere hitzaldian, enpresek Europako araudi berriek ezarriko dituzten eskakizunetara egokitzen hasi behar dutela azpimarratu du, bereziki produktu konektatuen segurtasunari dagokiena.
Era berean, ZIURek, araudira egokitzeko eta zibersegurtasuna indartzeko prozesuan laguntza eskaintzeko, industria-enpresen eskura Gipuzkoako Foru Aldundiak jartzen dituen tresnak, programak eta dirulaguntzak aurkeztu ditu.
Testuinguru horretan, María Penillak ZIUR Azelerazio Programa aurkeztu du, industria-sareari CRA legea betetzen laguntzeko diseinatutako ekimena. “Gure CRA Azelerazio Proiektuarekin lurraldeko enpresak lagundu nahi ditugu eta, besteak beste, haien produktu konektatuen ebaluazioa erraztu”, nabarmendu du.
Jardunaldian SPRI Taldeak ere parte hartu du, enpresen zibersegurtasuna indartzera bideratutako laguntzak azaltzeko; Cybasquek, berriz, zibersegurtasun-ratingari eta lankidetza komunitate birtualari buruzko informazioa aurkeztu du alde batetik, eta, bestetik, erakunde elkartuen zibersegurtasun mailaren inguruko BitSight nazioarteko plataformaren bidez lortutako datuak ere.