ZIURek zibererasoen simulagailu baten bidez entrenatu ditu Easo Politeknikoko ikasleak
Donostialdeko hamar bat ikaslek gorabeherei erantzuteko planak gauzatu dituzte prestakuntza gamifikatu batean
EASO Politeknikoa zentroko Operazio Teknologien inguruneetan Zibersegurtasuna espezializatzeko heziketa-zikloko hamar bat ikasle hartu ditu ZIURek bere egoitzan, OTko gertakariei erantzun eraginkorra emateko prestakuntza eskaintzeko, eta prestakuntza hori gamifikatua izan da.
Abenduaren 12an egindako saioan, Iñaki Torrecillak, ZIUReko ICS Security Architect-ek, eta Markel Gómezek, zibersegurtasuneko analistak, ziberintzidentea eraginkortasunez kudeatzeko gako nagusiak partekatu dituzte ikasle-taldearekin. Era berean, adituek ZIUR laborategia aurkeztu diete, laborategiaren erabilera-kasuak azpimarratuz eta industria-elementuetarako erremintetan eta soluzioetan sakonduz.
Gainera, ikasleek txapelketa baten bidez eskuratutako ezagutzak praktikan jarri ahal izan dituzte, eta talde bakoitzak bere trebetasunak probatu ditu benetako zibereraso baten agertoki simulatu batean. Horretarako, ZIURek Kasperskyko KIPS mahai-jokoa erabili du. Bertan, parte hartu duten gazteek ideia errealista bat lortu ahal izan dute, ura kudeatzeko instalazio bati egindako zibereraso batean gertatzen denari buruz, enpresaren segurtasuna, errendimendua eta diru-sarrerak kontuan hartuta.