ZIUR Azelerazio Programak aurreikusitako zibersegurtasun ebaluazioen % 25ari eman dio hasiera lehenbiziko sei hilabeteetan
ZIUR Azelerazio Programak aurreikusitako zibersegurtasun ebaluazioen % 25ari eman dio hasiera lehenbiziko sei hilabeteetan
Ziberresilientziaren Europako Erregelamendua (CRA) betetzen aurrera egiteko, Gipuzkoako Foru Aldundiak eta ZIURek bultzatu duten ekimenak, urtean konektatutako 60 eta 80 produktu eta zerbitzu industrial artean ebaluatzea aurreikusten du
Gipuzkoako Foru Aldundiak lurraldeko Zibersegurtasun Industrialeko Zentroaren bidez sustatutako ZIUR Azelerazio Programak, Gipuzkoako industria egitura konektatutako produktu industrialen araudietara egokitzen bizkortzeko helburuarekin, aurreikusitako produktu eta zerbitzu konektatuen ebaluazioen % 25a lortu du dagoeneko lehenbiziko sei hilabeteetan, eta 68 enpresak bideratu dituzte proiektuan eskuragarri dagoen zerbitzuren batean parte hartzeko interesa adierazteko eskaerak. 2025eko urrian abian jarritako programak 24 hilabeteko iraupena du guztira, eta 80 produktu arteko ebaluazioa jasotzen du.
Abian jarri zenetik, ekimenak aukera eman du lurraldeko enpresek garatutako 18 produktu eta zerbitzuren ebaluazio prozesua hasteko, zibersegurtasunaren arloko Europako etorkizuneko betekizunen aurrean prestatzeko, bereziki Ziberesilientziaren Erregelamenduari (CRA) eta aplikatu beharreko beste araudi sektorial batzuei lotutakoei dagokienez. Azelerazio Programa funtsezko apustua da Gipuzkoako industria sarearentzat lehiakortasunaren arloan, zibersegurtasuna lehiakortasunaren aldagai negoziaezina izango baita enpresentzat. CRAk zibersegurtasun estandar zorrotzak betetzera behartuko du konektatutako produktuei dagokienez, automobilgintzan, gailu medikoetan edo ekipo erradioelektrikoetan, besteak beste.
Ebaluazio teknikoez gain, prestakuntza-jarduerak, arau-aholkularitza sektoriala, osagai industrialen auditoretzak eta ahultasun teknikoen kudeaketa jasotzen ditu. Horretarako, parte hartzen duten enpresek zibersegurtasun industrialean espezializatutako hiru laborategiren eta OT, IoT eta IoMT zibersegurtasunean adituak diren hamar lagunen laguntza dute.
Gipuzkoan presentzia duten eta zibersegurtasun industrialaren ebaluazioan eta ziurtapenean espezializatuta dauden hainbat eragile teknologiko eta enpresarialen lankidetzaren bidez gauzatzen da programa. Inplikatutako erakundeen artean Telefónica, Thales eta Orbik Cybersecurity daude, Vicomtech, Ikerlan, Mondragon Korporazioa eta AFMren lankidetzarekin.
CRAri buruzko zalantzen postontzia
Era berean, ZIURek, Gipuzkoako Garapen Agentzien bidez, datozen faseetan programaren onuradun izan daitezkeen beste 50 enpresa ingururekin izan du harremana. Ildo horretan, ZIURek cra@ziur.eus postontzia gaitu du. Horren bidez, interesa duten enpresek Ziberresilientzia Erregelamenduaren (CRA) araudiarekin erlazionatutako zalantzak eta kontsultak helaraz ditzakete.
ZIUR Azelerazio Programa 2025ean sortu zen, Gipuzkoako industria egituraren zibersegurtasunaren arloko Europako eskakizunetarako egokitzapena aurreratzeko, konektatutako industria produktuen gero eta digitalizazio handiagoaren testuinguruan.
3 milioi euro dituen proiektuak lurraldeko ekosistema industrialaren lehiakortasuna eta berrikuntzarako gaitasuna indartzea du helburu, zibersegurtasun industrialean espezializatutako gaitasun teknikoen sorrera bultzatuz.
Oro har, ekimenaren helburua Gipuzkoa konektatutako produktu industrialen zibersegurtasunaren ebaluazioan erreferente gisa kokatzea, eta, aldi berean, lurraldean gaitasun teknologiko eta giza gaitasun berrien garapena sustatzea da.