Krisi-komiteen inguruko prestakuntza eskaini die ZIURek EHUko hogei bat ikasleri
Ustezko ingurune batean zibersegurtasun industrialeko estrategiak aplikatzeko modua irakatsi die ikasleei zentroak
ZIUR, Gipuzkoako Industria-Zibersegurtasuneko zentroak, OT inguruneetan zibersegurtasunaren oinarrizko kontzeptuak jorratzen dituen jardunaldi teoriko-praktiko batean parte hartzeko helburuarekin, Euskal Herriko Unibertsitateko (EHU) Sistema Enpirikodun Ingeniaritzako Masterreko bigarren mailetako ikasleak hartu ditu bere egoitzan.
ZIUR-eko ICS Security Architect, Iñaki Torrecillak, eta zentroko zibersegurtasun-analista Markel Gomezek gidatutako saioak OT inguruneetako zibersegurtasunean eta krisi-kudeaketan sakondu du, Informatika Fakultateko ikasleei arlo honetako funtsezko elementuen ikuspegi xehea eskainiz.
Alderdi teorikoa amaitu ondoren, ikasleek zibersegurtasun-gertakari baten simulazio gamifikatuan parte hartu dute, jasotako ezagutzak praktikan jartzeko diseinatutako ariketa batean. Kasperskyk garatutako KIPS simulazio-jokoaren bidez, edateko uraren tratamenduko zentral baten zibersegurtasun-estrategia ezartzen lan egin dute. Dinamikan zehar, hainbat gertaerari erantzun behar izan diote, neurri proaktibo eta erreaktiboak hautatuz. Esate baterako, segurtasun-auditoriak egin edo endpointen babes-soluzioak eskuratu.
Ekimen haun bitartez, ZIURek zibersegurtasuneko talentu espezializatuaren garapena bultzatzen jarraitzen du, ikasleei lurraldeko industria-inguruneen errealitatea hurbilduz eta haien prestakuntza praktikoa sendotuz. Zentzu horretan, zentroak lankidetza aktiboa mantentzen du hezkuntza-erakunde ugarirekin, besteak beste, SEIM, UGLE, Zubiri-Manteo, Easo Politeknikoa, Ingeniarien Elkargoa, Armería Eskola, Izarraitz LH, Lea-Artibai, Mondragon Unibertsitatea eta EHUrekin.
Azken erakunde honekin lotuta, nabarmentzekoa da ZIUR eta EHUk indarrean duten ZIUR Zibersegurtasuneko Enpresa-Gela arautzen duen hitzarmena. Ekimen honen helburua euskal unibertsitate publikoko irakasleen, ikertzaileen eta ikasleen gaitasunak hobetzea da. Era berean, berrikuntza, ezagutzaren sorkuntza eta transferentzia, sarean egindako lana eta zibersegurtasunarekin lotutako proiektuen garapena sustatzen ditu.